月島 (已結業)

同老公兩個去左奧運個邊做野，午餐要周圍搵野食，朋友仔話大全街個頭都幾多餐廳，而且幾間都唔同菜式，可以去搵搵有無啱食，於是我地就行過去個邊，順便當散步。好少黎大全街呢頭，但原來呢度收埋好多餐廳，最後行左幾間都係決定食日本料理，加上見到入面企理光猛，就入去試一試。因為無食早餐，所以除左每人一個主食之外，都叫左幾款刺身，結論係樣樣都好味，如果唔係地點唔太方便自己平時出沒的地方，應該都會成日黎食。月見豬肉，以清甜的洋蔥炒豬肉片，入口唔覺得油膩，反而有種洋蔥的甜味散發，配上完全唔會腥的日本雞蛋，配埋個白飯唔錯。我就叫左鰻魚飯，條鰻魚霸氣到遮住整個白飯。魚肉厚身結實，入口軟軟綿綿但帶有少許口感，魚肉唔會煮得過鹹，個燒汁味道適中。鯛魚兩食，下面係薄切鯛魚刺身，入口爽爽地，唔使沾醬油都好味，即叫即切夠新鮮；小碗係鯛魚他他，細切後再醃漬，入口好香蔥味，少少酸甜幾開胃。最後再加左油甘魚刺身、三文魚腩刺身、帶子刺身，三款都食得出非常新鮮，而且都係厚切上檯，口感十分豐富。個人最愛好重魚脂味的三文魚腩，入口嫩滑細緻，肥美無比。