Forever 520 (已結業)

成個餐牌同人講金牌乜招牌乜，點知叫佢午餐稍為貴少少嘅火石燒澳洲西冷，淨係根部有塊扒嘅1/3！塊扒已經細到好似快餐店嗰啲貨色，然後用鹽用胡椒醃到勁到好似要蓋住死肉味咁！收我$98？冇嘢呀？成碟野淨係得薯角好食！


主要難食都唔足以令我寫食評，最大鑊係：我一進店已經見到個紮馬尾嘅後生女員工拉低左口罩、不停用比普通食客用嘅餐紙不停抹鼻涕，一路用隻抹過鼻涕嘅手一直攞嗰包餐紙巾，期間仲抹抹下用隻手捽落用來抹啲食客餐枱嘅嗰塊啡色布度！佢掛住抹鼻涕一直都冇招呼我，我就係想睇吓佢玩完全程鼻涕之後會唔會唔洗手就走過嚟，點知真係！我同佢講呢啲時勢唔該你洗咗手先！佢話廁所有人！　跟住見我開到聲梗係立即走入廁所啦！但講真真係咁痴線！？

好啦食完水準低到不得了嘅牛扒之後，叫杯佢聲稱金牌咖啡，杯野一嚟到係勁多好似油泡咁樣嘅水珠喺咖啡個面度！
我立即同個侍應講，佢話啲奶有油脂會咁樣！但係做咁耐人，唔通唔識分？
咁好啦個侍應大大聲同沖嘢飲嗰個講，仲話個客話有油「喎」！你估跟住點？沖嘢飲嗰個唔戴口罩嘅男士，佢沖完另一杯之後，應該仲係有油，佢竟然以為人哋留意唔到，佢用匙羹撇走上面啲油！跟住我最後都係決定乜都唔飲就走！

由抹鼻涕嘅侍應、到沖嘢飲嗰位仁兄唔戴口罩、撇油，乃至洗碗嗰個見到佢出入都係將口罩拉低哂！咁可以解釋到點解啲杯咖啡會有油！佢哋衛生情況惡劣嘅程度，唔可能係個別人為問題，係全間餐廳嘅文化！