有人負責拍板叫餸，每張檯各叫左1隻燒鵝、1隻豉油雞、羊腩煲、鮮魚三食、胡椒豬肚魚湯、西芹炒蝦仁、清炒菜心1碟同清炒芥蘭1碟，每人仲叫左一碗白飯或者湯米粉。可能肚餓嘅關係，覺得第一樣起嘅燒鵝幾好，隻鵝都烤得夠香。
鮮魚三食先開始嚟料，其中一食係豆腐魚骨湯，都過得去嘅，但鹹左少少，有少少味精；第二食就係條魚起肉炒球，都幾多塊，勝在夠「襟夾」，都係啲普通質素；我覺得最大問題就係第三食－炆頭腩，啲頭腩嘅脆漿甜到飛起，嗰啲甜味唔係落糖嗰啲甜味，係過多味精嘅甜味。
之後嚟嘅羊腩煲亦都令人失望，羊腩唔夠「淋」。煲野都幾大煲嘅，但係成煲野佔大部份都係筍同支竹，羊腩得嗰少少，佢咁大煲都係靠啲筍同支竹墊高。豉油雞同西芹炒蝦仁相對呢講叫做無咁大問題，亦無驚喜，因為大家明知隻雞係冰鮮嘅。個胡椒豬肚魚湯嘅味道麻麻，有啲講唔出嘅味道。
最可悲嘅係嗰兩碟清炒菜心同清炒芥蘭，我地連呢兩碟菜都食得出有大量味精。本來兩碟菜心同芥蘭都好靚、好嫩，可惜上菜嘅次序同大量味精搞到變成失敗之作。最後，我地加多一碟揚州炒飯，可惜一見到呢碟「油淋淋」嘅炒飯，再諗番之前食左啲特大味精含量嘅餸，我已經無興趣再食……佢地仲送啲唔多靚嘅綠豆沙。
總括而言，每一樣餸都落左大量味精（雖然我知道出面應該無乜邊間食店係唔落味精，只不過佢落嘅份量過量……），相信成餐飯唯一無落味精嘅會係白飯。如題，今餐係可以試清味精係咩味……
P.S. (1) 我地叫左幾支啤酒，佢全部同我地開曬放喺個啤酒筒度，仲要俾多左我地，好似屈我地幫啲啤酒妹填數。搞到我地飲唔曬又無得退，開左又拎唔走。 (2) 佢個女洗手間係喺廚房入面，女洗手間就對正「執碼」嘅地方，可想而之佢嘅衛生情況係點……我諗我喺食野之前見到呢個景像，我應該唔會點敢食野……
