幸福班戟 (新城市廣場) (已結業)

這個是每次去日本必吃。第一次吃是在池袋，排咗超過兩個鐘，食嘅時候覺得每一口都係幸福嘅感覺，真係畢生難忘，完全理解唔到點解一個原味嘅班戟可以如此美味。自此之後每次去日本都要食，仲學識咗book定位，真係喺日本食每一次都有幸福嘅感覺。幸福班戟喺香港開咗一段時間，其實我冇去過，因為接受唔到用紙碟裝個班戟，外貌協會覺得咁樣扣咗分。今次來食主要係因為太耐冇去日本要懷念下。店舖裝修同日本一模一樣，入到店舖都幾有去咗日本嘅幸嘅感覺。我依然食我最喜歡嘅原味，軟綿綿入口即溶嘅梳乎厘班戟，配蜜糖同蜜糖味cream，我特別鍾意佢個蜜糖味嘅cream，完美豐富了班戟的味道。其實整體都係一個非常美味嘅梳乎厘班戟，香港來講已好高質，個味道都幾似日本，價錢都跟返日本唔算特別貴。但係，唔知點解感受唔到嗰份幸福嘅感覺。