瑞士咖啡室 (已結業)

難得朝早黎到律敦治醫院附近，本來諗住食腸粉皇做早餐，點知上星期仲放緊新年假冇開到，惟有轉戰瑞士咖啡室。 估唔到早餐都幾多吸引既選擇，由$25至$41不等，有粉麵、奄列、三文治、菠蘿油、美式早餐等，包熱飲，轉樽裝鮮奶/朱古力奶/意式泡沫咖啡/凍飲加$3，牛油多士轉奶醬多加$2。唔想食三文治/包類，又記得火腿奄列好一般，我揀左五香肉丁公仔麵餐 ($32) 轉樽裝鮮奶 (+$3)。 除左公仔麵之外，套餐仲有腸仔、煎蛋同牛油多士。 公仔麵製作需時，先上預先整定既腸仔、煎蛋同牛油多士都已經凍凍地，但腸仔煎得幾靚，煎蛋亦係流心。熱辣辣既公仔麵係普通配上清湯既人仔牌即食麵，室溫既五香肉丁幾足料，唔會杰到一pat野咁，食完都幾滿足。9點左右落單時叫樽裝鮮奶，阿姐都要問下送左貨未。 夠凍原樽上，食完個餐飲呢樽奶，唔知點解有種健康又閒適既感覺，加$3性價比都唔錯。早餐時段唔多人亦唔會趕人走，大部分客人都獨佔成個卡位，有時間黎歎下早餐都係一大享受。