平昌 (已結業)

無啦啦有個8號風球假期，4:00落左波，索性今晚做無飯煮婦，同阿仔去樂富搵食。好耐冇去，好多野都唔同晒，尤其多左好多餐廳食店，仲比我發現平昌韓燒，呢間之前係旺角都食過，印象都唔錯，咁就一於係呢度開餐。每枱都會有前菜供應，大豆芽菜同泡菜，食韓燒必須要有嘅😋，仲有一籃生菜，可以包裹燒肉一齊食，減少油膩感😊。我同朋友都係食肉獸，第一round 必定叫肉類，每款都叫啲，好食嘅就不停refill😆。雞翼同牛仔骨味道醃得唔錯，肉質都好嫩滑；豬腩肉同豬頸肉必定要燒至微微焦香，入口又爽又脆；西冷燒完都保持啲肉汁同口感，真係好正。大蝦同扇貝都好鮮甜，魷魚燒完口感好好，越𡁻越香口。呢度嘅泡菜豬肉湯鍋都好味，湯底有啲微微酸辣味道，豬肉都煮得好夠味，同泡菜一齊煮出嚟嘅味道好醇厚。最後介紹埋個生牛肉石鍋飯真係好正，生牛肉嫩滑，配上啲蔬菜同醬汁，好開胃，而且佢哋嘅石鍋真係非常夠熱，啲飯會微微起焦，好似食緊煲仔飯咁，呢個真心推介👍🏻，又好味又飽肚。