登堂 (已結業)

放工黎左觀塘登堂食dinner，見佢既dinner menu都幾吸引，包buffet既價錢都ok，忙碌過後要食好嘢慰勞自己。餐廳地方好寬敞，乾淨企理。我地叫左兩份main course + semi-buffet▫️烤焗紐西蘭羊鞍開心果保雲蘇．羊燒汁 Order五成熟，個人覺得呢個生熟度比較好食，羊鞍煎得剛好，冇咩血水容易切開，食落冇羊羶味，肉質嫩腍，羊鞍旁邊沾滿開心果蓉，再點上燒汁同薄荷醬啫喱，多重味道，薄荷醬味會搶少少，整體係好食既。▫️美國特級牛柳威靈頓．黑松露野菌汁 一上枱已經聞到好香既酥皮味，起刀切落咔咔聲，好酥脆，牛柳肉食落嫩腍、易咬開，非常juicy，配上香濃既黑松露野菌汁一齊食味道更佳，係夾既，又唔會搶哂本身牛柳既味道。Semi-buffet部份，我地幾乎每樣都拎少少試下，有刺身、各款沙律菜、熟食，甜品。我地覺得雞翼配羅望子汁幾好食，白酒忌廉汁煮青口都好食。甜品方面培茶蛋糕同蝴蝶酥都唔錯。雖然自助bar提供既小食唔會似酒店咁多，但貴精不貴多，大部分都係有質素，性價比高👍🏼