尚點 小籠包.上海麵館 (元州商場) (已結業)

上次喺旺角食完蟹粉小龍包回味無窮，今晚嚟到元州邨探個老友，咁啱元州商場入面有間叫尚點見到大大個banner寫住蟹粉，心思思又想再食過。餐牌上的價錢確實平過上次，但呢度裝修亦唔錯，而且坐得幾舒服，性價比似乎高一線。三人行點咗一個特價二人餐，包括鮮肉小籠包、雞絲粉皮、酸辣湯兩客、蔥爆牛肉、雞扒擔擔麵、高力豆沙，另外再加金黃蟹粉小籠包、韭黃鱔糊，埋單都係四百零蚊實在抵。先係雞絲粉皮，香濃麻醬味，粉皮又爽口，造得一啲都唔馬虎。足料酸辣湯，有肉絲，冬菇，木耳，豆腐等，已經比我感覺材料相當豐富，但個人感覺略為偏酸。鮮肉小籠包，湯水非常充足，且肉餡鮮味，蟹粉小籠包就明顯肉餡充滿蟹香，爆汁，再點上特備蟹醋，蟹鮮即時帶出，兩者外皮厚度造得好平均，亦無穿過湯。蔥爆牛肉，牛肉入味嫩滑，其實更適宜配上白飯，蔥段應該係用上京蔥，令整碟餸更香。雞扒擔擔面，炸咗嘅酥皮雞扒分開上，質素似台式鹽酥雞，香酥肉嫩，一塊份量有手掌咁大，擔擔面嚟講達到應有水平，花生醬料湯底濃味，麵爽。韭黃鱔糊炒得好香，鱔身無腥味，肉質彈牙又入味，又係白飯嘅好拍擋。高力豆沙，店員指定要食前十分鐘先Order, 因呢個甜品係熱食，第一次食感覺有少