日悅極尚日式放題 (已結業)

呢日同屋企人一行四人去到尖東食燒肉放題， 餐廳名叫日悅極品日式放題， 餐廳分咗兩部分一部分係日式放題 ，另一部分係燒肉放題， 餐廳都幾大間， 大概有200多個座位， 設有自助嘅飲品櫃， 自助嘅啤酒機，自助沙律吧，自助甜品櫃， 仲有最回本嘅高級雪糕任食， 呢度重設有一個小型嘅遊樂場可以畀小朋友嚟呢度放下電 。燒肉放題嘅餐牌唔算好多選擇， 但呢度嘅食材係品質取勝。坐低一陣店員就拎咗兩盤靚肉過嚟， 第一盤就有多款唔同牛肉嘅部位， 牛肉嘅油花都分佈得好靚， 有個牌仔可以分辨到邊一款肉， 所有部位嘅牛都好重口味 ， 冇乜邊款會特別多筋，第二盤肉係羊架， 呢幾塊羊架比平時出面買到嘅大件， 食落去唔騷。 檯面有兩支用電動調味料器嚟裝嘅黑椒和岩鹽， 真係有啲大鄉裡，一直都唔知調味料器都有電動。除咗燒肉之外我哋當晚都叫咗啲壽司嚟食， 因為餐廳另外一部分係做日式放題， 所以呢度嘅壽司都有番咁上下質素， 魚生都幾新鮮， 另外我哋都叫咗啲海鮮嚟燒， 呢度嘅海蝦係用咗大隻嘅虎蝦， 食落都幾爽口。我哋之後再後加咗啲牛肉和豬肉， 後加嘅肉嘅品質都好靚， 同埋份量都冇減少。