小魚兒 (富麗花園) (已結業)

肥雞鍾意食川菜好多人都知，今次肥雞去咗位於將軍澳嘅小魚兒， 試咗一個叫老壇酸菜豆花烤鱸魚， 呢間餐廳非常之貼心，辣度麻度配料全部都有得選擇。 因為肥雞個口生咗粒瘡， 所以今次所有都嗌小麻小辣， 除咗烤魚之外， 仲有好多平時打邊爐嘅配料可以選擇。 肥雞最鍾意食寬粉，咁佢嘅烤魚本身都配少少寬粉芽菜 ， 所以連配料肥雞都慳番 。 上到嚟， 孜然嘅香味十足， 海鱸魚炸得非常之香脆， 配埋老壇酸菜嘅酸香同埋豆花嘅甜味， 嗰個湯汁其實可以攞嚟撈飯一流。除咗食魚之外，佢嘅串燒亦都好出名。肥雞嗌咗燒牛肉串同埋燒牛舌心串， 有鹽燒同埋孜然口味畀你選擇，不得不讚呢一度嘅串燒非常之出色，口感一流，送上枱嗰陣熱辣辣， 配埋啤酒簡直係宵夜一絕。