平昌 (已結業)

上次喺「平昌」位於旺角嘅總店食韓燒體驗好好，一直都好想再返去食。咁啱知道原來佢地喺樂富廣場開左新嘅分店，位置更加方便我女朋友屋企，就一於去試下！餐廳location就喺樂富廣場A區，地鐵站出黎就係，所以非常方便。呢度嘅裝修樸實，但坐得都幾舒服而且，油煙味唔會好重。同旺角總店一樣，呢度都係食燒烤放題嘅。今次我地選左「大君」menu，食物種類都唔少，除左好幾款嘅肉類同海鮮之外，都有啲韓式熟食！肉類方面，我覺得調味烤牛肉、LA牛排、同埋牛舌最正，因為呢幾款牛肉嘅牛味十足！海鮮方面，扇貝同埋虎蝦都幾大隻幾新鮮，絕對係回本之選！熟食方面，海鮮豆腐湯好足料，所以非常鮮甜！至於炸蝦就好香好脆，而且大大隻！叫埋碗辛辣麵就最正！另外值得一讚係呢度嘅飲品大部分都係韓國進口嘅，當中連氣泡水同蒸餾水居然都係韓國牌子，即刻覺得好高級！總結：樂富平昌食物、環境、地段都好唔錯，值得推薦！