美心MX (已結業)

打風天，提早收工，知道超市街市一定好多人，所以決定買外賣。 可能我去到時間尚早，無乜人排隊，即時用自助落單機買野食。 揀左個去骨海南雞油飯，外賣，等左5分鐘到就走得。 由於職員pack 好晒先叫我拎，所以番到屋企先知袋入面有D乜。 打開個袋，感覺良好，食海南雞飯最緊要係醬汁，外賣醬汁用嘅膠盒係特別設計，分好一格格。 個人覺得比起平時用圓形膠杯仔好，因為真係可以夾住D食物點落去，唔會只係點到一邊。原來個飯配埋柚子汁椰茶絲沙律，同埋冬瓜湯。椰菜絲沙律 -  我初頭以為呢D只係伴碟，份量唔會多，點知有成半盒!! 柚子汁如果多少少會更好。冬瓜湯味道好，清甜，唔會太咸，亦無平時例湯嘅味精味。主角去骨海南雞飯，啖啖肉，亦好嫩滑，看似分量不多，但其實雞肉鋪左兩層，有一隻雞脾嘅分量。油飯亦都做得好，淡淡嘅黃色，有香味，少少濕潤，好味到我未食完D雞已經食晒碗飯！成個餐只係$51。個人覺得非常合理，因為平時係茶餐廳食個海南雞飯都要$70, 甚至$100. 香港三大快餐店當中，始終覺得美心MX質素最好!