龍城冰室

營業中

休息中

平時經過龍城冰室都見到有好多遊客幫襯。咁啱今日嚟旺角辦事想快手食個晚飯，就揀咗嚟呢間食睇吓佢咩料。鋪面大間，裝修光猛醒神。晚市時段都滿座咁滯。見佢有一人套餐，又有我最鍾意食嘅招牌酸菜魚。平時食酸菜魚大碟嘅可能都要二百幾蚊，見今次平平哋$88就可以食到，就毫不猶豫叫咗。以茶記水準嚟講，碟酸菜魚都幾精緻，連菊花瓣都有落。香料亦都落得好足。其中仲有炸蒜、芝麻，令到個酸菜魚分外香。味道都算正宗。魚肉片份量都算正常，係切得比較薄。其他配料有白蘿蔔片、酸菜、萵筍。白蘿蔔會比較咸，送飯比較適合。Overall 不過不失啦，以$88食到好味酸菜魚嚟講，可以滿足吓口癮。