屋子生活 (已結業)

之前經常都會嚟屋子食件Cake飲杯啡，馬鞍山呢間環境特別舒服。今次踩單車前都會嚟呢度嘆個午餐，最鐘意坐榻榻米位置，由天花到地下既落地大玻璃，採光度太好啦真係，開啟悠閒舒服既一天~

醬烤鰻魚($118)+醬油蛋拌飯+$5+美式咖啡
烤鰻魚相當有驚喜，味道保留左魚油香味；肉質方面比想像中更軟滑，油脂比例岩岩好，亦完全唔需要擔心有骨等問題。

豚角煮($95)+醬油蛋拌飯+$5+西柚冰茶
採用咗半肥瘦嘅三層肉，肉質燜得軟稔入味，味道偏甜，入面仲有幾舊白、紅蘿蔔，同樣入晒味，配飯一流。

Lunch set包飲品同滑子菇白味噌湯
湯係一個套餐入面真係擔當住好重要既角色! 食到飽飽地既時候飲啖湯真係太舒服啦。飲品方面不過不失，比較驚喜係西柚冰茶好多新鮮西柚肉，落足料架。