皇庭匯 (已結業)

由於我們已經有一段時間都無嚟「皇庭匯」旺角店喇，所以我們一家四口今日下午就去咗飲下午茶！喺揀緊想食咩點心嗰陣，見到他們有新款點心推出咗，所以我們就叫咗鴛鴦豬仔包嘅造型賣相非常趣緻可愛，而入面嘅餡料係香甜嘅奶黃，除咗有一對豬仔包之外，仲有一個冬菇包，入面嘅餡料係香甜嘅冬瓜蓉！黑芝麻流沙包嘅包質超香滑軟熟，入面嘅黑芝麻餡料非常流沙，味道極之芳香濃郁，食得出黑芝麻嘅份量真係超級足料，先可以有食完會齒頰留香嘅感覺，真係超正呀！所以係本人嘅必食推介！皇庭匯蝦餃皇嘅餃皮好煙韌薄身，蝦肉相當爽甜彈牙，而且都幾大粒！燒汁魚肉釀茄子嘅茄子好軟滑，頂層嘅魚肉好鮮味彈牙，而燒汁嘅味道亦好惹味，而且唔會過鹹！原盆馬拉糕真係原個上，唔係祇得半個，真係好抵食，而且質感非常香滑鬆軟，味道亦唔會過甜！椰絲甜薄𦉘嘅椰絲同花生碎粒份量真係好足料，多到漏咗出嚟，而薄𦉘嘅質感就非常煙煙韌韌，食落覺得層次感好豐富！總括：諗唔到隔咗一段時間無嚟，今次嚟到食，他們嘅出品質素仍然都係咁好，真係值得讚賞！