新嚐泰泰國餐廳

營業中

休息中

以前喺灣仔返工，好食嘅泰國嘢其實唔多，跟朋友嚟到呢間樓上舖，估唔到平日夜晚坐坐下都滿座，食第一啖就明解。醉酒佬辣炒豬肉碎肥粉可以話係呢度嘅名物，有鑊氣得黎完全唔油膩，其實淨係個肥粉已經足以令我嚟多次，非常透薄煙靭，調味好香口惹味，仲有好多豆角同雜菜，就算係怕肥嘅女仔都好啱口味。小食拼盤係少數令我覺得出色嘅拼盤，每樣小食都獨當一面值得單點。 魚餅、蝦餅、春卷同肉丸全部熱辣辣新鮮炸起，重點係感覺到用料唔頹，簡簡單單嘅粉絲春卷都好好味。 第一次試肉丸生菜包，肉丸炸得好透好酥脆，甜辣醬以外仲有個蜜糖汁，感覺到廚師嘅誠意。大頭蝦冬蔭公意想不到最有驚喜嘅係個蝦，從來未食過大頭蝦係咁爆膏，有食緊奄仔蟹嗰種感動，蝦肉都好彈牙，三大隻蝦已經值回票價。 冬陰功好重椰漿味，夠晒酸辣，但真係完全冇就香港人口味，食開九龍城lv真係必須叫少辣。