泰 (銅鑼灣廣場二期) (已結業)

之前都試過呢個集團嘅其他餐廳 mini friday同日本嘢，覺得都幾唔錯今次就去埋銅鑼灣試埋佢呢一間比較新嘅泰式餐廳 Thaiology~~~ 其中呢間餐廳最吸引我嘅就係佢哋都有手搖海鮮袋食正呀！ Shake Shake海鮮袋平時喺西餐廳先有機會食到嘅海鮮袋，依家有泰式版，而且價錢都好吸引，佢哋分別係$298有3款，$468有5款，$728有8款。海鮮種類都幾多，有小龍蝦，鮮蝦，藍青口，墨魚仔，扇貝，虎蝦，大蜆，魷魚圈，翡翠螺，鮑魚等。想食豪啲仲可以加錢升級原隻波士頓龍蝦同埋原隻活大肉蟹。醬汁方面就有兩款分別係泰式生蝦汁同冬蔭公汁。我哋呢次揀左泰式生蝦汁，因為較適合我哋呢啲唔太食辣嘅人。海鮮都好新鮮，肉厚飽滿，食落好滿足，蘸埋佢哋惹味嘅醬汁，完全突顯出海鮮嘅鮮味。泰式小食拼盤小食種類豐富，分別有惹味嘅泰式魚餅，彈牙爽口嘅炸蝦餅，香脆嘅雞翼，脆卜卜嘅春卷，仲有香氣四溢嘅沙嗲，加埋佢哋嘅秘製花生沙嗲醬就仲滋味。原個菠蘿炒飯：炒飯鑊氣十足，飯粒夠乾身，加埋菠蘿同提子乾，令味道口感更加豐富。泰式鮮蝦炒金邊粉鑊氣都好夠，調味得宜，酸甜適中，大蝦又夠爽口彈牙，好有泰國嘅地道風味。