2DP (已結業)

行過尖沙咀厚福街，見到有間西式fusion素食餐廳，見到入面裝修幾靚，於是入去試吓。睇睇餐牌，佢地都有好多選擇，又主食，甜品同飲品，選擇困難証嘅我，終於選擇咗幾款試試。原個南瓜忌廉大麥飯，個南瓜係日本南瓜，入口非常香軟同好甜，大麥飯係第1次食，覺得比普通飯，更有咬口，有少少煙韌，個忌廉汁都非常出色，d汁沾滿晒喺d飯上面，好creamy,好滑。50/50 蕃茄水牛芝士pizza，佢個批底係傳統果款薄批，烤得好香脆，d芝士都好香口，佢話用純素水牛芝士，我覺得好重芝士味，好食過普通芝士，上面仲有大量蕃茄，呢款pizza食落完全冇罪惡感。菠蘿熱情果沙冰，呢個沙冰飲落好清新，d果味好濃郁，一飲落去菠蘿味好特出，而熱情果味又酸酸甜甜，簡直係消暑之選。泰式奶茶刨冰，佢喺賣相已經相當吸引，成盆盆栽咁，上面黑色果d原來係oreo碎,加上少少練奶，佢d刨冰全部都係泰食奶茶味，d刨冰刨到好似原芯咁一條條好幼細，食落口即溶，好香濃嘅奶茶香味，比港式奶茶濃郁，呢款甜品真係幾特別，必試。