五要素食堂 (已結業)

喺The One行行吓街，求其入咗間餐廳食，估唔到有驚喜。幾個朋友都唔係好肚餓，所以就叫咗幾樣嘢食一齊share，埋單發覺性價比幾高，下次有機會再嚟試埋其他嘢食~喺手機落單嗌嘢食之後冇幾耐好快就上菜，首先嚟咗個牛舌沙律，牛舌份量比想像中多，唔止一啲餐廳咁好孤寒得幾粒，同埋粒粒都肉厚多汁，燒到啱啱好，唔會過熟咬唔開，亦都冇筋，下次去想試埋個和牛沙律。第二道叫咗蟹肉闊意粉，係我覺得咁多嘢食中最好味。首先同沙律一樣，蟹肉份量超級多，幾個朋友share都夠食。另外佢主打手打意粉，啲意粉比平時食到嘅有咬口，少少煙韌，幾有蛋香，必嗌之選。最尾叫咗個甜品tiramisu，因為我本身唔太好甜品，覺得呢個甜品中規中矩，唔會太甜。