龍鳳號 (已結業)

今日响觀塘行下街，心郁郁想食台灣野，最終去左附近一間叫龍鳳號的餐廳。餐廳佈局有種傳統復古味，全部用晒木枱木椅等，就連櫃都用上木色。呢到係用點餐紙，自己畫，基本的台灣菜，如擔擔麵，滷肉飯等都有，選擇都多。飲品係支裝，非常衞生。點左支桂花胎菊蜜，可以揀凍同熱。飲落甜甜地，帶清幽的菊花味，入面仲有明目的杞子添，而朋友叫左青檸百香果，佢都話幾好飲，不過就略有小小甜。惹味肉燥湯新竹米粉味道唔錯，新竹米粉超幼，口感帶點硬身，令嚼勁同質感都比一般米粉好，而撈埋D肉燥，好惹味，唔會太鹹又唔會太淡，味道剛剛好。鹽酥菇好值得點，每粒都好香脆，漿粉唔多，又唔會層層油，炸得幾好，嚟到個陣，仲係熱辣辣呢。成個質感，可以話內軟外脆，好好味！湯點少得傳統的台式迷你佛跳牆，唔好睇見細細甕，二個人分都非常夠，而入面D料亦好足，有鮑魚，魚翅，海參，干貝等，味道香濃。菇都係大大隻，咬落又有彈性。整體食物唔錯，價錢中等，不過最好係原來無加一服務費，不過就變相無水供應，飲品要點選。