必勝客 (已搬遷) 新店位置

唔知點解...每次食pizza hut都好似要等半個世紀咁耐先食到咁，唔知大家有無同感呢??但係因為童年既回憶，果一份既親切感，就算明知要等咁耐，你都會間唔中就會想去食下咁，呢啲是咪叫自己攞黎呢。今次我哋叫左個新既批，係「巴馬火腿牛油果火箭菜普通批」，因為我本身好鍾意食巴馬火腿，所以一見到佢有呢個批，就算平時自己只會食至尊厚批都好，都想叫黎食下。不過都無令我失望，佢既巴馬火腿都好夠味，咸香味濃，如果材料方面可以略為多一點點，成個感覺應該會更好的。由於係一個套餐，我哋揀左「意式肉丸意大利粉」，肉丸都很入味，個香濃蕃茄汁醬我都好鐘意，加上意粉既軟硬適中，不過敗在有黑橄欖，令到成碟意粉都有一陣「澀味」，扣左唔少分。另外小食方面，我哋揀左「辣味雞翼配火腿腸」，其實呢兩樣都好穩陣的，辣味雞翼直頭係pizza hut既扣招牌雞翼，都無人唔識，基本上雞翼控既朋友們黎到pizza hut 都一定會叫的。火腿腸更加唔須要多講吧。一紅一白既餐湯分別係「白汁忌廉湯」和「意式雜菜湯」，總括黎講，呢餐飯都滿意的，至少食到我想要既味道。沒有失望既感覺。