深宵食堂 (已結業)

同好友想食日式串燒，大家就講起深宵食堂，一於去試下。訂左枱有卡位坐，舒舒服服。餐廳細細，以淺色木板為主要裝修，感覺舒適。首先點杯柚子梳打，甜度啱啱好，cheers!望住餐牌，有好多嘢想食，就由海鮮開始，點客汁燒帆立貝先！粒粒都脹卜卜，貝邊燒到脆脆，咬落彈牙，連少少汁食已經好夠味。煙肉蠔卷，煙肉唔會燒到太乾身，蠔仔細細容易食，蠔味香濃，一齊入口，好惹味！黑豚露筍卷，豚肉肥美香口，包住嫩滑嘅露筍，咬落juicy，露筍減輕左豚肉嘅肥膩感，食多幾件都無問題！芝士年糕，外層煙韌，包住香軟嘅芝士，芝味無窮。汁燒肥牛金菇卷，甜甜地嘅汁配埋燒到啱啱好嘅肥牛，香濃好味。燒翠肉瓜，最普通但係又燒得最好食嘅，咬落juicy，清清地好味道！上菜速度好快，一碟緊接一碟，食到停唔到口～