Dates (已結業)

Item: Dates
Rating: 2
Author: 蝗蟲同學

103 食評

味道

環境

服務

衛生

抵食

旺角

$101-200

西式西餐廳

蝗蟲同學

等級4

13-11-2008

從食友 Facebook message thread 中得知呢度有心太軟食, 仲好似話不錯, 趁呢日要去旺角, 拉了朋友0黎睇睇. 0黎到門口赫然發覺係港式得很的港式西餐廳, 不過既然未0黎過, 又試試. 見 set dinner 又湯又主菜又飲品仲有得加錢要個甜品, 結果一人叫一份 ($68) 再一人加一個自選甜品 (每份加 $28).

餐湯揀了羅宋湯, 幾稀, 飲落好鹹, 難飲. 唯一好在雜菜份量唔少, 當食多幾羹 fibres 吧 -_-"
朋友揀了粟米磨菇忌廉湯, 飲了一啖話「拍得住新寶馬咁難飲」(「新寶馬」即係呢度: http://www.openrice.com/restaurant/commentdetail.htm?commentid=154229), 我就覺得比新寶馬更難飲 -- 同羅宋湯一樣稀, 味道 = 生粉水 + 罐頭粟米 + 磨菇粒, 認真唔掂!
麵包 (黑糖包?) 反而唔差, 暖烘烘又幾鬆軟, 可惜牛油硬如石頭, 美中不足.

大家的主菜都揀了扒, 但 order 時店員並無問我0地兩份扒要幾多成熟 (!!!), 心已涼了半截... 而食完之後的結論係, 如果當呢度係茶餐廳咁看待佢 d 食物, 會開心少少的:
- 我揀的香草羊脾扒, 賣相完全唔似羊扒, 似快餐店「雜扒餐」的豬扒多 d, 肉幾韌, 食落只有醃料及疑似 gravy 的味道,「媒」多幾「媒」先有少少羊味; 件頭唔細, 但有超過一半都係一舊舊肥膏來的, 果然係一舊水有找的羊扒 -_-" 粉開的薯茸好「KFC 走 gravy」feel; 西蘭花及椰菜花就見到都唔想食, 所以決定唔食.
- 朋友的西冷牛扒一樣韌, 一樣只有醃料及疑似 gravy 的味道, 肉味被梳打粉 "la" 走得一乾二淨; 同茶餐廳出品0既唯一分別, 應該係呢塊0野叫做厚少少?

主菜咁 xyz, 對甜品期望唔敢太高, 亦可能因為咁, turned out 又 ok?:
- 心太軟伴0云呢0拿雪糕 (散叫 $38): serve 時底部已開始漏漿, 一拮落去就有更多朱古力漿流出, 賣相幾對辦. 朱古力蛋糕質地 spongy, 我覺得太乾, 不過蘸了朱古力漿及雪糕, 當然又唔同; 朱古力味道唔算濃郁, 但唔係靚0野的關係, 都收貨了; 身體不適, 0云呢0拿雪糕就只食了一啖, 感覺一般香滑. 整體唔及灣仔 La Bons (http://www.openrice.com/restaurant/commentdetail.htm?commentid=1913926), 但比起同區的 Magic Cafe (http://www.openrice.com/restaurant/commentdetail.htm?commentid=1907530), 我覺得呢個好食 d, 可以一試.
- Creme brulee: 樣衰到無人有, 使唔使咁多 icing 呀!?!?!? 可幸食落唔算太差, 雖然一定唔係好 -- 面層焦糖太厚, 結果食落好硬, 下面的 custard 算香甜, 但實在幾0鞋身. 西餐廳0黎講呢個 creme brulee 絕對水準以下, 但都係0個句吧, 唯有「自我安慰」, 當佢係茶餐廳吧.

仲有杯熱咖啡, 奉上的係花奶 (!!!!!), 未飲已聞得出係酸澀味的, 飲落亦然, 唯有放棄; 朋友更唔俾面佢的凍檸茶, 飲了一啖立即將佢擺埋一邊.

環境裝修疑似西餐廳, 但白檯白椅始終唔「襟」污糟, 黑色一0鞋0鞋感覺好差; 招呼亦係茶餐廳式招呼, 果然 -_-"

每人約 $105 埋單, 話貴唔貴, 但就一定唔係平, 唔會再幫襯了.

P.S. 睇你個心太軟份上, 俾 marginal 到唔 marginal 的 ok 面你啦.