串燒殿 (已結業)

今日做完Facial約咗朋友食宵夜，太耐冇食宵夜嘅關係，似乎進入左報復式嗌嘢食嘅狀態。我哋落咗單大約10分鐘，就已經有得食。見到呢幅食物大合照，自己都有啲嚇親。原本覺得自己嗌嘅時候唔係好多嘢，點知嚟到樣樣都咁大份。我哋叫咗好多唔同款嘅串燒，其中個雞腎都幾乾身。多春魚都係好乾身，仲燒到脆卜卜添。原隻燒魷魚都燒到啱啱好唔會變咗魷魚乾，不過就唔係好入味。我哋仲叫咗生蠔同埋扇貝，佢啲生蠔扇貝都幾大粒，唔會話縮晒水咁都唔錯嘅。另外仲叫咗一隻燒大虎蝦嚟試吓，啲蝦肉都幾大牙，啖啖肉都唔錯。平時食錫紙金針菇就食得多，但係今次見到有錫紙萵筍，仲要見到寫住必食推介，所以就叫咗嚟試下。不過似乎就唔係好入味，亦都偏硬，萵筍嘅根都未批乾淨，感覺麻麻地。然後有個燒花甲，不過佢個感覺就比較乾身，而且啲辣粉都係喺個殼上面，所以反而花甲肉就唔係好有味。而佢個鴨血粉絲就真係有啲驚喜，因為估唔到佢咁大兜。粉絲索晒啲汁都幾唔錯。值得一提嘅係呢度個職員都幾Nice，上菜嘅速度超級快，對於餓着肚嚟食宵夜嘅人嚟講，絕對係一個唔錯嘅選擇。