淳壽司 (已結業)

跑馬地口禮頓道一連有三間日本菜，有次同朋友行過諗食邊間好，其中一個點名話唔食一壽司，而我又覺得鈴木嘅嘢食一般，所以最後扑鎚食依間。以壽司嚟講依間都做得不過不失，大路嘅款式都一應俱全，比較另類嘅例如秋刀魚、胺康魚肝、蝦仔等通常都麻麻地好食。朋友們鍾意食蟹腳柳同牛油果，而我個人就比較喜歡火炙系列。佢哋個蒸蛋都唔錯，魚生飯同其他小食就份量細咗啲，整體嚟講算平均。環境方面，其實裝修算唔錯，地方都算寛敞，但客人好似普遍比較喜歡坐order枱多過廻轉枱，可能因為師傅嘅態度比較散漫所致。唔知係咪附近多樹木，店內不時有小蟲低飛徘徊，依方面店方要努力改善下。其實各方面依間餐廳都算過得去，但生意就明顯比鄰近兩間對手差，我相信主因係服務方面。侍應嘅態度雖然唔算差，但就總係心不在焉，漏單追單等情況頗為常見，試過有一次同朋友幫襯叫佢哋俾杯熱水，三番四次提醒都係俾唔到我哋。而且侍應嘅訓練明顯不足，俾客人睇見個個好似心神恍惚會好影響店鋪嘅形象。依間壽司鋪開張初期送俾每個客人一個冲繩鎖匙扣，俾人嘅印象都唔錯，但要保持住服務質素先至可以令客人再嚟幫襯，依方面佢哋就要加把勁，否則強敵環伺好快就會俾人淘汰。