Nathanhouse (已結業)

首先晚上大概八點入到去一坐低，侍應話所有熟食要盡快落單，因為廚房要整好耐…我環顧四週，得果大概8-10枱客，好多已經開始食緊嘢。作為一間喺大規模商場嘅餐廳，如果你個廚房連10枱客以內都應付唔到，咁可想而知啲出品係咩料🤦🏼‍♂️今晚點咗個「冬蔭功海鮮意大利飯」，先唔講啲所謂海鮮完全無味，嚴格嚟講你收我$170蚊我都唔會有乜嘢期望！最敗筆係個所謂「冬蔭功」…只見到係白色嘅意大利飯，嚟到時我都打咗個突，問侍應係咪真係冬蔭功？連個侍應都皺一皺眉頭走去問廚房呢碟係乜嚟。好啦…最後個侍應都好唔好意思行埋嚟話佢係一碟冬蔭功意大利飯，咁我唯有再聞下佢兼食咗一啖…對唔住！我真係完全睇唔出同食唔出佢何來稱得上為「冬蔭功」！另外女朋友叫咗個肉眼牛扒，要七成熟，一鋸落去已經知唔對路。首先把刀唔係鋸扒專用嘅，只係一把利少少嘅餐刀，如果真係七成熟，要切認真唔會有難度；但我就好似要同塊扒角力咁，切開咗係血紅色仲係咁滲血水，其實成塊扒得五成熟咋😖。