廉記冰室 (春園街) (已結業)

放暑假去書展前，要食飽先有戰鬥力。早上十點幾成十一點到達灣仔的廉記冰室，唔使等位。茶餐廳都係果幾個早餐，沙爹牛麪之類同雪菜肉絲米果D囉～講真個早餐一D都唔“廉”，盛惠37蚊，係九龍食開32蚊，知道港島的確係貴幾蚊嘅，係我唔習慣啫~雖然係咁，但係佢真係俾足料，雪菜同肉絲真係800度近視冇戴眼鏡都睇到，個湯底係有煙燻味，咪誤會唔係話佢有燶味呀！係話佢有別於雞粉湯啫；個餐麭係有肉味(睇嚟似煙肉)配埋個自己擦的 anchor 牛油粒，唔使食咁油，適合我呢個怕肥嘅女仕，但缺點係個麭凍嘅；半條司華力腸脆皮好食， 煙肉都幾厚，煎得香，絕對唔係果D炸到乾柴嘅平價嘢，正；個菠蘿包係跟餐嘅，暖暖地鬆軟的麭夾埋個脆口的菠蘿面，好食；沙爹牛個麪係福麪，配個福麪湯，不過不失咁啦～喺“廉記”唔敢叫咖啡，怕唔“老嚟”，奶茶係奶茶味，鴛鴦係奶茶同咖啡味咁囉！總括而言，回頭率甚高。