Cafe Dreamin' Akiba (已結業)

自從蛇王黨上年11月第一次上過黎cafe dreamin' akiba後，就已經視呢度為基地喇！今年4月壹周報導過呢度既生意麻麻，分分鐘要蝕錢，所以決定多D上黎幫襯，支持店長！ 一行四人上黎，叫左兩個萌萌蛋包飯（下面兩張圖），兩個店長特製綿綿蛋包飯（上面兩張圖），另外四杯野飲呢度每個蛋包飯都會由女僕用茄汁畫圖，次次唔一樣架！(左上隻熊大係咪好似樣呢！)而家手機都收收埋埋十幾張蛋包飯圖喇！ 講返食物先。唔好睇呢度既賣點係女僕cafe，其實食物質素好高架！ 去過咁多間樓上cafe，呢度野食係數一數二咁好食！蛋包飯入面既茄汁炒飯好香，有雞肉、洋蔥、冬菇做餡。至於蛋都永無失手，唔會過熟或過生，配炒飯啱啱好。如果點綿綿蛋包飯，會先上炒飯（比普通蛋包飯多左粟米、生菜同蕃茄），過多陣，店長就會揸住隻鑊行過黎，擺隻蛋上炒飯面，然後切開一半：塊蛋就會攤開左，變成一塊軟綿綿嘅蛋皮喇。食左會感覺到店長真係好用心煮每一個飯，而女僕們都好有熱誠架！希望多D人上黎支持吓店長，等cafe可以繼續做落去！