元朗人家 (已結業)

呢間酒樓都開左好一段時間，原來仲未有人寫食評，咁等我寫第一篇吧。酒樓喺一樓，上嚟要搭一層電梯，落去就要行樓梯喇。裝修都幾光猛，枱與枱之間空間足，唔會迫，坐得都幾舒服。盡頭中央有大電視，正在播新聞。餐具都幾污糟，未用時已經咁多污漬，惟有自己洗吓佢。睇下點心紙，又真係幾抵食。咁嘅價錢算係平，假日比平日，每款點心只係多一兩蚊。基本上全日都係一個價，唔駛計咩特價時段。下午茶仲有啲特價嘢食，好抵~早茶仲有超抵孖寶︰介紹吓啲嘢食，【$11腊味芋頭糕】芋頭同腊味都好足料，仲要煎到熱辣辣好香口又唔油，好食!【$15蜂巢炸芋角】而家好少酒樓有做芋角，呢度有得食，好難得，大讚!又係唔油，入面多料，好鬆化，正!【$19.8脆香腩仔湯瀨粉】瀨粉幼身，幾爽滑。要讚一吓個燒腩仔，肥瘦適中，腩皮唔厚，燒到好香好鬆脆，入口即化。【$18香茜叉燒腸】食完晒三款點心，仲未嚟，叫阿姐去催單，阿姐都態度好嘅，但回覆係賣晒喇。賣晒又唔講聲，等我哋傻傻的等。