馬德里餐廳

營業中

休息中

耐唔耐都黎馬德里食野，貪佢間店大坐得無咁迫，是日同朋友買完野又黎左坐下食啲野，四點幾鐘基本上得兩成入坐，鍾意坐邊都得啦。揀左張卡位坐，濶濶地好坐啲，快快落單等食啦。好快就送到嘅茶走同凍檸茶，茶走夠熱，檸檬茶爆多冰同檸檬，有少少苦。朋友叫嘅焗咖哩牛柳粒意粉，個賣相正正常常，有數粒牛柳同薯仔，咖哩汁都幾香，不過唔辣同太稀，搞到啲汁完全黏唔到上意粉到。自己叫左焗鮮茄豬扒意，賣相都幾好，上枱時好香噃。意粉爽口唔過淋，個汁夠杰身有茄味，仲幾多芝士添，豬扒已切件容易食，軟腍無渣幾好。五十蚊個餐都幾抵食呀，會再黎嘅。