alfafa (樂富廣場A區) (已結業)

呢排捉精靈成為收工活動，今晚收工去到呢度，先去食晚餐，呢排喜歡食西餐，可以飲杯咖啡！呢間在商場內，橙色加淺木色，燈光昏暗，氣氛幾浪漫，因為已經過了晚飯高峰時間，所以只有半滿，店員任我揀位坐！揀了一個梳化位置，幾有私隱！晚餐價錢比一般屋村西餐略貴！落好單食物要耐心等候！餐湯：蕃茄芝士忌廉湯，呢種配合比較少見！係打到好滑嘅忌廉湯！微酸幾開胃！不過無乜芝士味！可惜唔夠熱！餐包：麥包仔夠熱！幾鬆軟！無搽牛油都好味！熱咖啡：本來叫了後上，點知又係即刻上（咁做乜問我使唔使後上）熱咖啡夠熱好香濃，味道微甘易入口，可以解膩！拿波里汁炒大蝦蜆肉天使麵（$90）賣相幾靚，蝦肉幾大隻已拆殻，爽口彈牙，蜆肉多不過無乜味！好在唔腥！醬汁杰身掛滿天使麵，酸酸地開胃！幼天使麵滑身微微彈牙！好味！店員有禮斯文！收碟都會問一句！係咖啡度有啲溝通問題！屋村內幾舒服嘅西餐！