影片
更多
2011-02-25
56 瀏覽
穴藏未開張前爸爸已經日日話要黎幫襯，因為收倒風佢地請左幾個大有來頭既師傅坐鎮。穴藏其實係Ana F&B Group旗下既第三間餐廳。記得同屋企人早兩年前去過同集團間壽司店，當時好滿意，所以未食都已經對佢好有信心。環境衛生：1) 位於中環蘭桂坊口，巴士，小巴，電車，地鐡，的士乜都到，地點好就腳。2) 室內裝修非常美觀：柔和既燈光好舒服；選用石壁磚塊作牆身造成洞穴既氣氛好襯餐廳個名；喺牆內加藏酒櫃更令食客彷如置身於一個隱世酒窖之內進餐；感覺high爆。3) 被扣分原因係間private room出現左問題：第一，因為只用屏風隔開，所謂房間就唔係好夠私人空間啦。第二，雖然唔洗跪 tatami，不過座位冇椅背，坐得好辛苦，再加上冇扶手，出入都幾困難，有位uncle重"dun"親添。第三，因為房內空間唔多，所以姐姐仔埋黎加茶同擺放食物都好有難度。4) 日本料理有生有熟，對店內既衛生好講究，所以標準都應該要得到滿分。穴藏無論食材，餐桌，餐具，地方都好乾淨企理，合格都好理所當然。服務：入左房好快就有熱毛巾同熱茶，好warm。成餐飯重有位姐姐仔專程招待我地，好似VIP咁。雖然佢既活動空間有限，但係佢完
環境衛生：
1) 位於中環蘭桂坊口，巴士，小巴，電車，地鐡，的士乜都到，地點好就腳。
2) 室內裝修非常美觀：柔和既燈光好舒服；選用石壁磚塊作牆身造成洞穴既氣氛好襯餐廳個名；喺牆內加藏酒櫃更令食客彷如置身於一個隱世酒窖之內進餐；感覺high爆。
3) 被扣分原因係間private room出現左問題：第一，因為只用屏風隔開，所謂房間就唔係好夠私人空間啦。第二，雖然唔洗跪 tatami，不過座位冇椅背，坐得好辛苦，再加上冇扶手，出入都幾困難，有位uncle重"dun"親添。第三，因為房內空間唔多，所以姐姐仔埋黎加茶同擺放食物都好有難度。
4) 日本料理有生有熟，對店內既衛生好講究，所以標準都應該要得到滿分。穴藏無論食材，餐桌，餐具，地方都好乾淨企理，合格都好理所當然。服務：
入左房好快就有熱毛巾同熱茶，好warm。成餐飯重有位姐姐仔專程招待我地，好似VIP咁。雖然佢既活動空間有限，但係佢完全冇怨言或黑面，重臉帶笑容地埋頭苦幹，好值得讚賞。
味道：
刺身/壽司篇：
巖穴之士：前雲海壽司師傅光師傅 ~ 一入到門口佢就認得出身材同聲線都咁出眾既爸爸，搞到爸爸開心到勁點頭。因為穴藏宣傳中冇提及過光師傅，所以爸爸見到佢時好驚喜，更增強對晚餐既期待感添。
頭盤：食物擺放喺好別緻既＂穴藏＂木碟上，好睇得。每款食物都調左味，大部份都係酸酸甜甜，好醒胃；除左飯團，魚生，螺，麵醬青瓜同菜，重有白果，令口感好多元化，大家都好滿意。
刺身拼盤：師傅教過刺身要由淡味開始食，不過對魚認識唔深既小弟通常都選擇由淺色食起（池魚；油甘魚；拖羅；maguro；秋刀）。淨係睇相都可以感受倒色澤光鮮既魚材好夠魚油，咬埋落去簡直係頂瓜瓜。魚肉非常鮮甜香滑肥美，一Ｄ都唔腥，連平時我好少食既Maguro質感都好正；唔怪得知爸爸見倒光師傅笑到見牙唔見眼啦。
燒拖羅壽司：用槍輕輕燒一燒拖羅，再塗上師傅既秘汁同加上葱花，食落爽嫩既口感非常之有層次；帶甜而微辣既秘汁絕對冇蓋過魚既鮮味；無論口感味道都無懈可擊，唔試大家真係走寶；超級必吃也！
天婦羅篇：巖穴之士：前稻菊天婦羅師傅Eric，勇師傅 ~ 勇師傅既創意就好似一個藝術家咁，運用由稻菊帶過黎既天婦羅技術，用日本芝麻油同埋一Ｄ平時唔會炸既食材黎製成佢自創既天婦羅美食，令人嘆為觀止。
調味料：雖然餐廳都有提供我地平時常用既天婦羅醬油加蘿蔔蓉同薑蓉，不過師傅建議我地用檸檬，咖哩鹽，同海鹽點黎食，為求保留天婦羅香脆既口感。
蝦；用海鹽黎點，果然係冇用汁液黎點咁soggy，好香芝麻味，而且好鬆化，尤其係個蝦頭，非常脆口，好似食緊薯片咁，完全冇渣，可以話係一個新體驗。
沙錐魚：新鮮熱辣，自己選用咖哩鹽點，一Ｄ都唔辣，不過食落就少左本身既芝麻味；肉質都算係嫩，不過個人都係比較喜歡食生既魚多Ｄ。瀨尿蝦：要讚既係肉質唔嚡唔老；不過可能食慣椒鹽瀨尿蝦，所以覺得唔係好夠味。
鮑魚：師傅解釋話鮑魚要煮左先再炸；味道鮮甜，唔洗點調味都已經好好味，不過就有少少韌。
蜆：無錯係連殼炸，真係估佢唔倒。又係唔需要加任何醬汁或鹽已經好夠味，鮮甜無比又唔乾，全場讚不絕口，天婦羅必吃菜式。
腐皮釀蝦膠：香脆爽口，點鹽或醬油都好好食；配搭新穎，不過就唔及個蜆咁正啦。如果係套餐，建議喺上蜆之前先上依道比較淡口既腐皮釀蝦膠。
海膽：又一創意天婦羅，邊個會諗倒濕滑既海膽都可以攞黎炸呢？用塊薄薄既紫菜黎固定個海膽，重可以同時加埋天然既咸味，真係好聰明。食落脆中帶軟，好得意，不妨一試。
其他：清湯：清湯內有個魚蛋cube（真係方形架）同菠菜；魚蛋cube好似溝左豆腐喺入面咁，好軟熟，味道甜甜地幾得意；唯一唔係好夠熱。
油甘魚魚鮫：烹調既時間剛剛好，皮脆肉嫩，香口得黎唔會乾，又唔會油，yumyum！
Sake 篇：巖穴之士：唔講真係唔知，穴藏有位全港得兩個既華人「利酒師」（日本酒合格品酒師）Thomas哥哥為客人挑選美酒配襯餐廳煮製既佳餚。當晚主人家好客氣，帶左好幾支喺日本買返黎既靚酒比大家品嚐。得知Thomas哥哥係獲得日本酒廠認可既利酒師時，主人家更邀請佢即席品評。因受酒精影響，而且離佢好遠，所以聽得唔係好清楚，只係記得兩樣比較特別印象深刻既野：
1) Thomas 哥哥試得出其中一枝酒因為收藏得唔好，味道已經變左。當然，佢立刻好仔細地講解應該點樣收藏日本酒啦。
2) 當比較酒既味道時，佢用＂少女＂同＂少婦＂黎作比喻，生鬼有趣，令人好易明，亦令氣氛變得輕鬆。
後記：
1) 今次好榮幸可以見識倒三位高人既功力，認真大開眼介。
2) 因今次係比人請，價錢詳情唔係好清楚，所以抵唔抵食唔夠資料評論。只係＂聽講＂穴藏既天婦羅比煮法一樣既稻菊平，壽司價錢亦算合理。
3) 同桌食飯既長輩感覺暗淡既穴藏喺格局上比較適合後生人幫襯；佢地覺得危險wor。
張貼
