多利民素食 (已結業)

食得肉多，間中都想食下素清清腸胃，之前經常都會經過呢間素食舖，今日決定入黎試下。餐廳有各式各樣素菜客飯，食飯包湯或豆漿，亦可加錢轉其他嘢飲。落單後店員好快就送上老火湯，雖然無用肉去煲，但飲落依然清甜，湯料有冬瓜，紅蘿蔔及大量眉豆，全部都煲到好淋好好味。今日叫咗最基本嘅羅漢齋飯，份量都幾大碟，材料有雲耳，紅蘿蔔，豆卜，珍珠筍，菇及娃娃菜，每樣餸都唔會炒得過熟，食落唔會太鹹，用黎送飯一流。唯一美中不足嘅係無我最愛嘅筍片，如果可以加埋就好了。總括黎講，呢度嘅素食味道唔錯，價錢亦平民，下次要黎試下佢啲素扒了。