博多一幸舍 (已結業)

過去半年食過唔少拉麵，我唔可以話對拉麵熟悉，但總算開始了解自己喜歡邊種口味嘅拉麵。啲人對我嘅口味瞭解，提議我試博多一幸社，話佢哋嘅豬骨湯濃得黎唔太杰，咁啱'吞泡'經過，餓鬼纏身嘅我就俾佢吸咗入去。拉麵款式除咗有濃厚原味豚骨，黑色嘅黑芝麻炸蒜油拉麵，仲有清淡嘅清新豚骨拉麵同神炎激辛拉麵，而我就揀咗微辣嘅明太子海鮮麵。等緊麵嘅時候就梗係周圍睇下影下，枱面有多種配料，紅薑，高菜，蒜泥，餃子醬油，拉麵醬油，辣油等。加分!雖然麵黎到嘅時候冇飄香，賣相卻不俗，麵質爽口而唔太硬，好輕微嘅鹼水味。叉燒係肩肉薄切，微鹹，入口軟滑，正合吾意。湯底入口唔油膩，鹹香嘅海鮮湯帶黏，豬骨味唔太濃亦唔羶，雖然未算清爽，但係我都飲得哂個湯。一面飲湯時一面諗，啲明太子呢? 飲落雖然唔濃郁，但隱約食到明太子嘅辣同腥味，飲到最後發現啲明太子原來全部沉哂底，我當然唔會放過，食哂佢啦!