三巡小廚 (已結業)

海南鴛鴦雞油飯首先稱讚下間餐廳佢喺保持社交距離做得好好，每張枱都分隔得好舒服。雖然佢嘅午餐份量唔算特別多但係食材每一部份都係好食嘅。先講講佢嘅油飯每一粒飯都好煙韌同埋有香茅味係做到油飯嘅。不過本人略嫌飯有少少硬。而佢嘅鴛鴦雞都係做得唔錯嘅如果鍾意食有口感嘅雞肉嘅話呢應該好鍾意，但係如果鍾意食好滑好滑身嘅雞呢就可能爭少少。但係最想稱讚係鴛鴦飯嘅醬料，佢嘅特製豉油醬好配合呢個飯非常好食，係出乎意料之外。另外再嗌左一個星洲八魚蛋喇沙呢個都係不過不失正常嘅喇沙佢嘅八魚蛋口感都唔錯嘅。飲品方面：熱奶茶就冇乜特別啦。如果好鍾意飲茶餐廳奶茶呢就可能會有少少失望。如果鍾意飲星馬嘅奶茶，都唔會覺得出色。所以我都評定唔到呢個係港式奶茶定係星馬奶茶啦。以Yoho 呢個稍為舒服嘅地段嘅餐廳，呢個價錢都值得食嘅。重點係唔使加一所以都幾抵。經開可以食，但個人唔推薦特別為咗呢間餐廳已入元朗食。