炎天丼 (已結業)

是日約左朋友喺旺角交收，朋友提議晚飯食呢間，呢間店係主打天婦羅，諗住未食過就去試下啦! 我地大約7點鐘去到只有兩檯客食緊，地方四正，乾淨企理。睇完個menu，決定食海鮮天丼 ($80)，朋友食唐揚炸雞+手打稻庭烏冬(熱)($68)，另外仲叫左碟日式紫薯BB天婦羅($20)。海鮮天丼 ($80)首先黎左碗湯，碗湯個人覺得有啲鹹，而且唔似麵豉湯，普通; 之後就係沙律，我覺得個沙律幾好味; 再之後就係主角出場，海鮮天丼上面啲天婦羅擺得好靚，海鮮有日本甲紋魷魚、日本蟹肉棒、虎蝦、流心蛋、菜心苗、茄子、蓮藕。天婦羅啲炸漿都算薄，日本蟹肉棒好好食; 蓮藕好爽口; 第一次食菜心苗天婦羅，脆卜卜; 茄子就相對油左啲，始終茄子本身好吸油; 虎蝦就正常，都幾彈牙; 日本甲紋魷魚就普通，無咩特別; 食完飯上面啲天婦羅，就開始用流心蛋撈飯食，個流心蛋又係炸過，幾好食，檯面仲有飯素同醬汁可以加。日式紫薯BB天婦羅($20)我覺得好普通，同我喺出面買一包包急凍既無分別。店舖而家4月做緊優惠，如果like佢地facebook page就送一包日清麵，店員話好好食架。服務都幾好，免加一服務費，收現金或八達通。