日本料理「和亭」 (已結業)

約朋友睇戲,入場前先去醫肚. 朋友提議去和亭,我初初仲以為係屬和花亭團隊,去到坐低先知原來係和民集團旗下,唔通係平價和民?!其實我都唔係好記得當日所有食物的名堂,只記得用渣X信用咭叫廿九蚊的小食可以加一蚊要多款. 以下牛油帶子就係其一,味道唔錯,平均只係十五蚊一款,真係幾抵...身邊有幾個朋友都係三文魚怪,每次一齊食壽司總會叫好多好多三文魚壽司,刺身等等. 三文魚刺身賣相造型好靚,而且幾新鮮; 壽司都唔錯; 至於另一個三文魚拼盤都OK,雖然話可以試晒幾款三文魚壽司,但味道無乜特別,我寧願叫番普通版...珍寶帶子刺身又真係幾大隻,而且幾好味.炸蝦天婦羅大隻得來又幾爽口,唔錯唔錯,只係嫌一碟三隻太少!最後一個雜錦鍋,無乜特別,勝在可以玩打邊爐; 仲專登叫加個烏冬,食飽飽...食完感覺真係一間平價版的和民; 食物雖然唔係話勁好食,但都有一定質素. 可惜分店並唔多,就連油麻地這間分店對我來講都唔係好就腳,不過有機會行過都會再幫襯o既.