三橋一品日本料理 (已結業)

喺長者屋邨租領展舖開日式食店，係個好大膽的賭局。帶老友記嚟食晏，生冷嘢以外有唔少熱食，取價合理，設梳化卡座，冷氣唔太凍，令老友記未起筷已開心咗一半。壽喜燒喺今餐最受歡迎之選，材料有肉、菜、蛋同粉絲，夠大份，一窩足夠二人開心些牙，肉同菜的份量都好足，唔會夾兩轉就冇晒。初見佢個賣相都嚇咗一嚇，不銹鋼器皿變咗花面貓，加上冇酒精爐㷫住佢，驚啲食物唔夠熱。食落就知擔心係多餘，加上個煲夠深，先可以載到咁多食材。泡菜炒豬肉飯有鑊氣，肉唔多，好啱送飯；咖喱豬扒飯完全唔辣，喺日式香甜咖喱，豬扒唔韌，老友記都食到。食物好味過隔離邨間大門，老友記話味精唔重手，啱晒怕甜怕鹹嘅佢。