Burgeroom (美麗華廣場1期)

餐廳環境黑黑地，夠chill可以同朋友吹水，情侶撐枱腳又得。提供牛、雞、海鮮、素漢堡，適合各類人士，又有炸物小食。晚市7點左右到，已經幾乎full。

叫左大烤菇芝士牛肉漢堡($110)，牛油果醬芝士雞柳漢堡($98)，芝士旋風薯條($60)，鱈魚手指配他他醬($55)，自家製菠蘿冰茶($38)。

大烤菇芝士牛肉漢堡

$110

所有漢堡除加煎蛋外，會切開2份，唔鍾意切開既話落單前可以提出。漢堡超高厚身，塊牛肉漢堡同塊麵包一樣咁厚。就算拎起半份，d餡好豐富，好難夾得實，要好小心食呀。

牛肉肉汁邊食邊流出黎，好重黑胡椒味，唔膩。大烤菇既口感好似食緊肉咁，感覺好似有2塊肉，帶d甜味。蕃茄少少酸，可以中和濃郁既肉味。

牛油果醬芝士雞柳漢堡

$98

雞柳漢堡相對上冇咁高身，但同樣大份。牛油果醬多到瀉，食到有少少少少辣味。

雞柳係雞扒好厚一大塊，咬第一啖邊位，都已經食到雞肉。食到底層麵包開始吸左d肉汁，變軟左少少。

芝士旋風薯條

$60

旋風薯條呈圈圈咁，有別於平時食既直薯條，夠得意。炸得脆，唔熱氣。芝士半溶淋上去，過一陣食芝士就會變固體少少，但冇損味道。

鱈魚手指配他他醬

$55

炸鱈魚條外皮脆口，內裏軟，配埋他他醬凍凍地，幾夾。

自家製菠蘿冰茶

$38

冰茶底部有大量菠蘿肉碎，所以飲前要攪一攪勻。陣陣茶味，飲完冇咁熱氣既feel。

整體，餐廳有勁多款漢堡，睇到眼花撩亂，款款都好吸引。食完果然冇失望。女仔食半個，都其實好飽肚，仲有多款小食揀，所以性價比高。仲可以靜靜地食，侍應由帶領入座到離座，都招呼周到，難得。