之後通常都會喺呢度食埋飯，今晚老婆仲約左外父外母添，
有老人家喺度，揀酒樓就一定啱食架啦，所以今次黎左富臨皇宮。
呢度個佈置都幾靚架，唔怪得咁多人結婚都揀呢度啦。
一坐低就望下menu先，選擇相當多，小菜、海鮮、燉湯、燒味等等。
正當苦惱之際，侍應就過黎向我地推介今晚嘅燉湯同精選海鮮，
既然係咁，就照佢推介寫幾個餸啦。
原本仲想叫羊腩煲，但係太多人叫，已經賣晒了。
甜品都幾吸引，如果一陣食得唔太飽都可以諗諗。
呢個湯真係要推介一下，除左姬松茸、花膠、響螺呢啲貴價食材之外，仲有雞腳、瘦肉之類，
認真足料，而且色香美味，我仲夾左好多花膠比老婆同外母佢地，夠晒滋潤。
老婆最鍾意食鮑魚，佢話有陣果皮清香，而且都算幾腍，百零蚊有6隻都幾抵食。
牛仔骨黑椒味濃，但肥左啲啲，而且只係得幾件，反而配菜嘅蕃茄、蘿白比較多。
海蔘炆得好腍，而冬菇及鵝掌都吸收了鮑汁的精華，豐富多重口味。
今次我地無叫飯食，叫左個生煎包試下，煎得好香口啊，
我仲食左兩個，真係仲飽過食飯呀。
