泰COOL (鴻圖道) (已結業)

今日來到觀塘區有開倉，搏殺完已經係下午茶時間，見到附近呢間泰國餐廳下午茶幾抵食，就同朋友仔黎醫下肚啦。餐廳環境開揚，我地坐卡位，向窗望可以望到街景，坐位寬闊又舒適，可能因為係星期六下晝關係，餐廳唔係太多人。下午茶都算多選擇，我地叫左兩個餐加兩個小食，另外仲叫左一份沙律share食。鮮蝦金柚子沙律 :份量都幾多，沙律除左有柚子肉及大蝦外，仲有椰子肉、蔥粒及生菜等，食落清新爽口，嚴嚴夏日用黎作開胃菜一流。炸魚餅 : 一份有四塊，魚餅即叫即炸熱辣辣，入口彈牙夠味道，亦唔會覺得太油膩。春卷 : 網狀春卷皮炸得香脆，餡料有芋頭、蝦及甘筍，食落爽口好味。泰式豬手飯 : 豬手軟淋入味，豬皮脆之餘唔會覺得肥膩，伴碟有青瓜及半隻蛋，配埋特製酸辣沾醬黎撈飯，唔錯。香煎香茅豬扒配無骨鳳爪沙律 :無骨鳳爪絕對係我嘅最愛，入口爽口彈牙，味道唔會太辣，唔駛吐骨食落好方便，香茅豬扒煎得香口脆身，份量都幾大件，唔需要食飯都夠飽。椰汁西米糕 :食完主菜覺得唔係幾夠喉，就叫左一份甜品，椰汁西米糕入口清甜軟滑，好香椰汁味，入面有西米、粟米粒及芋頭粒，味道唔會太甜。