犢食 (已結業)

星期五晚上想平平哋咁食，但又想有啲質素，就上咗嚟呢一度，順便當然要支持一下良心小店。舖頭細細，開頭睇以為要立食，睇清楚，其實係高枱高凳，輕鬆格局，兩個人嚟就啱晒，而且都幾企理，乾淨整齊。人多呢，我會建議takeaway，反正佢啲餐具全部都係即棄，拎返公司食都好方便！我揀咗溫泉蛋牛肉丼，等咗唔係好耐，就有侍應生幫手捧過嚟俾我，我仲以為唔使加一，會係自助形式，週到！牛肉丼真係要讚下，啲洋蔥係好有心機咁煮，有一種焦糖化咗嘅口感，牛肉味好濃，汁料好夠味，最啱送飯，不過我揀咗食烏冬，係靚烏冬，唔係三幾蚊一包嗰種。烏冬彈牙好味，細細碗，啱晒我。主食不太大份，大食嘅人可能唔夠，我就叫多咗一串魷魚串，同埋一隻帆立貝。䰹魚串好食，燒出嚟都仲好Juicy，隻帆立貝個味道係幾好食嘅，不過我都係會推薦魷魚多啲。去開APM的話，行過嚟都係2分鐘左右，可以食平啲又食好啲。