Little Tipsy Restaurant & Bar (已結業)

係觀塘接朋友放工，接近晚飯時分，朋友就介紹一間係佢公司附近既隱世西餐廳試下啦。餐廳係王子大廈，好近地鐵站，地點非常就腳。上到去餐廳佈置好舒服，環境好大，meun 上既選擇亦都好多，而且餐廳叫得little tipsy, wine list 亦都有好多選擇。我地好快就諗好諗好晒食d 乜野，頭盤就叫左個24個月巴馬火腿配無花果醬多士，賣相非常精緻，火腿好好食，多士配合特制既無花果醬，味道好清新，多士配合火腿，令到味道唔會太咸。主菜就叫左個安格斯肉眼扒配蕃薯條及田園沙律，牛扒叫左5成熟，賣相好靚，外表燒得非常香，切開見到好多肉汁，口感非常淋。配菜亦一d 都唔馬夫，蕃薯條又健康又比薯條本身帶有甜味，非常好食，沙律果面，沙律汁好出色。另一個主菜就叫左個香煎海鱸魚，鱸魚表皮煎得好香脆，廚師亦都係擺碟時花左心思，利用伴菜墊高鱸魚，唔會比魚湯令表皮變軟，保持香脆，魚肉非常滑，煎得岩岩好，魚湯亦非常鮮甜。總結，餐廳十分有驚喜，無論裝潢或者食物質素都媲美高級西餐廳，但價錢十分大眾，絕對值得推介。