掂檔車仔麵 (已結業)

喺尖沙咀做嘢， 山林道的餐廳一早已經俾我試勻曬， 正當同同事 喺到懊惱 到今日午餐要食乜時， 見到雞蛋仔隔離開咗間新嘅餐廳，係賣 車仔麵同埋海南雞飯， 咁不如就試下新嘅餐廳啦。車仔麵四十二蚊有三個餸， 仲有杯熱嘢飲送㖭, 有唔同嘅餸可以揀， 除咗又唔同嘅麵底之外， 湯底又可以揀鹵水汁或者牛腩汁， 悉隨尊便。我同friend嚟食, 佢叫咗牛腩蘿蔔同埋章魚小丸子米粉, 牛腩都炆得入味嘅, 估唔到佢嘅章魚小丸子有d似墨魚丸, 另外蘿蔔都大舊, 又甜又多汁。而個麵底就 叫左米粉， 份量都幾多。另外因為唔夠菜食我哋叫咗碟唐生菜 同埋手拍青瓜 ， 價錢唔算好貴 ， 都係幾蚊啫 ，都可以接受㗎。而我就叫咗碗 韭菜豬紅冬菇 米線， 冬菇厚肉入味， 豬紅都幾多件， 如果韭菜可以畀多少少就好啦。為食嘅我哋另外仲叫咗個16蚊兩份嘅小食， 有兩隻雞翼同埋三粒 炸龍蝦丸， 餐廳加咗啲孜然粉係上高， 鹹鹹哋都幾惹味。總括嚟講食個便飯都唔差㗎， 希望下次再嚟過可以試埋海南雞飯啦。