盤子工房 (海趣坊) (已結業)

估唔到屯門碼頭都有靚 cafe。盤子工房唔單止地方乾淨企理，室內設計同擺設都好有心思，食物質素亦非常高。自家製青醬煙三文魚意粉份量好多，意粉 al dente 之餘，青醬味道濃郁，加埋 parmesan cheese 同橄欖油，真心好食😋，唯一扣分係煙三文魚只有兩片，略嫌唔夠喉。盤子大早餐非常大堆頭，包括黑松露炒蛋，熱狗腸，大啡菇，沙律菜，煙肉，煙三文魚，牛角窩夫，菠菜芝士薯仔波同芝士蕃茄，其中我最鍾意嘅係牛角窩夫，香脆微甜有蛋香，唔使點任何醬汁都好好食；另外薯仔波都好特別，比較少見，入面好 creamy，食得出芝士，薯仔同洋蔥味（點解食唔出菠菜味😂）。唯一較失色係蕃茄，味道好淡😐。最後杯 Dirty 都值得一讚，啡奶比例剛好👍，唔怪之得咁多人推介；對面位杯 Mocha 我冇份飲，唔知質素如何，不過淨係睇個拉花咁靚，奶泡打得咁綿密，水準應該都唔錯。