雲桂川冰室 (已結業)

今日同老豆兩個行咗去屯門碼頭一帶，懷緬下過去，事關以前老豆喺呢邊打過十幾年工，我都住過喺碼頭區域一段時間。不過碼頭真係無乜特別嘢好食，以往都慣咗行過嚟龍門居/富健花園一帶搵食。呢個朝早嚟咗呢間富健花園樓下嘅雲桂川冰室，餐廳門口對正龍門路，位置相當易搵。一般茶餐廳大路早餐都有得選擇，比較特別係某幾個餐配咗黑松露炒蛋同奶油豬仔包。老豆揀咗鮮牛肉米粉餐，配餐肉煎蛋同一件多士。牛肉數量唔少，平時去茶記食早餐多數食沙嗲牛肉，醃得比較重味，呢個清清地老豆話啱佢食。我呢set就係重頭戲喇，吉列豬扒+黑松露炒蛋+奶油豬仔包，額外加$5有一碗凈湯米粉，睇到個份量已經可以直接skip埋個lunch。吉列豬扒夠晒大塊，仲大過我成隻手。奶油豬仔包都好高質，外層酥脆，內裡鬆軟，再加埋奶油真係非常吸引。最後係主角黑松露炒蛋，呢到可能有成3-4隻蛋，食極都食唔晒，當然去茶記唔會期待係好高級嘅黑松露醬，但係呢個價位已經收晒貨！