越南咖啡室 (已結業)

之前都有喺晚市幫襯過呢間餐廳，晚餐人均消費一百左右，味道都唔錯。今次試下幫襯午市，人流比晚市多好，等咗一陣先入得。Lunch Set 包嘢飲，抵食過晚市好多，我哋嗌咗兩個Set。 泰式無骨海南雞飯油飯夠香，醬汁亦出色。雞肉夠滑夠入味，但係浸得唔係好夠，有一舊生生哋之餘仲要連住舊血水啫喱，要扣分。海鮮喇沙湯底夠鮮甜，好好味道，椰奶味超級香濃！但配料就真係hea到爆，魚片蟹柳唔好食，而魷魚仲要靭到𠝹晒花都係完全咬唔到，失望餐飲 熱奶茶&熱檸茶熱奶茶中規中矩啦，但隻杯勁細隻，兩啖就飲晒喇。熱檸茶茶味苦澀，檸檬雪過夜乾乾哋，成餐最差就係呢杯熱檸茶。午市同晚市嘅水準真係有差距，下次都係揀返晚市靜靜哋先再幫襯過。