首先講吓個泰式乾炒雞河粉～ 一上枱就聞到超香鑊氣！河粉炒得啱啱好，唔會太油亦唔會癡埋一舊舊，每條都上色均匀。雞肉嫩滑唔鞋，仲有啲芥蘭、蛋絲同豆腐乾一齊炒，口感豐富。最正係佢個調味，帶少少甜同辣，仲落咗青檸汁，食落特別開胃。鍾意食辣嘅朋友，加啲旁邊嘅辣椒粉，更加惹味！
至於個泰式雜錦海鮮煎都係誠意之作～ 外層煎到金黃香脆，入面就塞滿魷魚、蝦仁、蜆肉等等，海鮮份量十足，每一啖都食到鮮味。個煎餅口感有啲似蠔餅，但就更加香口同有咬口。點埋佢哋個特色酸辣醬，真係停唔到口！
呢度價錢合理，食物有質素，而且上菜速度幾快。如果想喺尖沙咀食啲平民泰國菜，呢度絕對係個唔錯嘅選擇！已經諗定下次要試埋佢哋嘅冬蔭功同芒果糯米飯～
2
