妹記大排檔 (已搬遷) 新店位置

星期五個日放左學之後行左一陣街，就同男朋友搵下有咩野食，行到金巴利道見到有為數十幾人係門口排隊，就去睇下間野係食咩啦，原來d人就係排緊妹記，咁我地以為咁多人排隊都應該ok啦，咁我地就拎飛排隊。入左去之後我地叫左三樣食物同一枝啤酒兩個飯，個三樣野食都好唔得，我地叫左鋼鍋雞，個鍋一d都唔熱不特止仲要成個鍋得五至六件雞，其他都係d蔥蔥蒜蒜，另外有一個蒜蓉粉絲蒸絲瓜，好油，不過已經係叫做可以入得下口個碟，另外一個叫做鬼馬油炸鬼，其實係將d墨魚滑上炒拎去炸，炸嘅食物應該係脆，不過佢好明顯係返炸過唔知幾多次，完全係硬到咬唔到落去咁滯，我男朋友就同佢地d職員講呢個餸好硬，佢竟然夠贍話佢係比較硬架，我即係呆曬囉，比較硬都唔會硬到咁呀，之後我地都無食到就埋單啦。我臨走之前去左個toilet，見到人地個鬼馬油炸鬼比我地個碟淺色好多，好明顯佢地係返炸比我地啦。個日兩個人去食比左$197，不過係食唔飽，因為d野真係太難食都無咩點食到，以後一定唔會再去囉。