尖沙咀韓國餐廳多到數唔晒，但要做到一條街開足三間分店，真係唔講得笑！今次就嚟咗呢間人氣爆燈嘅「南대門」，見佢咁有氣勢，質素都估到唔會差！😇
✨ 必點超值BBQ晚市套餐 ✨
呢度嘅晚市套餐CP值超高！我哋叫咗$388嘅牛肉Set，有齊燒牛肉、兩款主菜，仲可以無限續加前菜，呢個價錢食到漢牛真係幾抵
⭐️無限追加前菜： 韓式泡菜、醃製辣蘿蔔、涼拌菜、辣拌豆芽、生菜沙拉，樣樣都好開胃，等食韓燒前都有嘢𡁻！
⭐️BBQ肉眼： 超大塊嘅肉眼，油花分佈均勻，烤到五分熟就啱啱好，肉質細嫩多汁，啖啖都係肉香！
⭐️主菜（雪濃湯+牛膝骨湯）： 呢度嘅湯底係必叫！我哋叫咗雪濃湯同牛膝骨湯，兩款都係用新鮮牛骨熬製，湯頭濃郁醇厚，膠質非常豐富。飲落暖胃又滋補，充滿牛骨精華，配料有牛膝骨、蘿蔔同粉絲，飽足感滿滿！
總括嚟講，南大門嘅韓燒質素高，套餐又抵食，前菜仲任添！怪不得開咁多分店啦！👍
